ಮಿರರ್ ಚಾ ಮತ್ತು ಬೂಸ್ಟು

ಇವತ್ತಿನ ಸ್ಪೇಷಲ್ಲು ಮುಂಬೈ ಮಿರರ್ ಚಾ ಮತ್ತು ಬೂಸ್ಟು !! ಹಾಗಾಂದ್ರೆ ಏನು ಅಂತೀರಾ? ಹ್ಹ ಹ್ಹ ಹ್ಹ. ಏನಾಯ್ತು ಅಂದ್ರೆ ಇವತ್ತು ಬೆಳಿಗ್ಗೆ ಚಾ ಕುದಿತಾ ಇರುವಾಗಲೇ ಅಡಿಗೆ ಗ್ಯಾಸ್ ಖಾಲಿ ಆಗಿ ಹೋಯ್ತು.  ಬೇರೆ ಉಪಾಯ ಇಲ್ಲದೇ ಇರೋದರಿಂದ ನಾನು ಮತ್ತು ಸುನೀತಾ (ಭಾಯಿ) ಸಪ್ಪೆ ಮುಖದಿಂದ ಅದನ್ನೇ ಕುಡಿದ್ವಿ. ‘ ಭಾರತ್ ‘ ಗೆ ಫೋನ್ ಮಾಡಿದ್ರೆ ಸಂಜೆ/ ನಾಳೆ ಬೆಳಿಗ್ಗೆ ಕಳಿಸ್ತೇನೆ ಎಂದು ನಾನು ಸ್ವಲ್ಪ ಅರ್ಜೆನ್ಟ ಅನ್ನೋದರ ಒಳಗೆ ಆ ಭೂಪ ಕಟ್ ಮಾಡಿ ಬಿಟ್ಟ. ಈ ಮನೆಗೆ ಮನೆಓನರ್ ಪೈಪ್ ಲೈನ್ ಗ್ಯಾಸ ಕನೆಕ್ಷನ್ ತಗೊಂಡಿಲ್ಲ.  ಜೊತೆಗೆ ಆಗ ಇಲ್ಲಿ ಹೊಸ ಸಿಲೆನ್ಡರ್ ಗ್ಯಾಸ್‌ಗೆ ಅಪ್ಲೈ ಮಾಡಿದಾಗ ಎರಡು ಸಿಲೆನ್ಡರ್ ಸಹ ಕೊಡ್ತಾ ಇರಲಿಲ್ಲ. 😦

ಮಧ್ಯಾಹ್ನ ಆಗೋ ಹೊತ್ತಿಗೆ ನನ್ನ ನಾಲಿಗೆ ಚಾ ಕುಡಿಲೇ ಬೇಕು ಅಂತ ಶುರು ಮಾಡಿತು.  ಅದಕ್ಕೆ ಯಾವತ್ತೂ ಇಲ್ದೇ ಇರೋ ಅಷ್ಟು ಆಸೆ ಇವತ್ತಾಗಿತ್ತು. ಹೊರಗೆ ಉರಿಬಿಸಿಲಲ್ಲಿ ಹೋಗಿ ಪಾನಕದ ಟೇಸ್ಟಿನ ಚಾ ಕುಡಿಯೊಕೆ ಮನಸ್ಸಾಗಲಿಲ್ಲ. ಕರೆಂಟ್ ಬೇರೆ ಇರಲಿಲ್ಲ. ಇಲ್ಲಿ ಆರ್ ತಾಸು ಲೋಡ್ ಶೆಡ್ಡಿನ್ಗು!  ಹಾಗಾಗಿ ಮಾಡಕೆ ಬೇರೆ ಏನು ಕೆಲಸ ಕಾಣ್ತಾ ಇರಲಿಲ್ಲ. ಅದಕ್ಕೆ ನಾನ್ಯಾಕೆ ಒಲೆ ಉರಿಸಬಾರದು ಅನ್ನೋ ಹೊಸ ಐಡಿಯಾ ತಲೆಗೆ ಹೊಳಿತು.

ಸೀದಾ ಎದ್ದು ಅಡಿಗೆ ಮನೆಗೆ ಹೋದೆ. ದೀಪಾವಳಿ ಆದ ಮೇಲೆ ತೆಗೆದಿಟ್ಟಿದ್ದ ಹಣತೆಗಳನ್ನೆಲ್ಲ ಹೊರಗೆ ತೆಗೆದೆ. ಕಿಟಕಿ ಹೊರಗಡೆ ಇಟ್ಟಿದ್ದ ಟೈಲ್ಸ್ ಪೀಸ್ ಎತ್ತುಕೊನ್ಡು ನೆಲದ ಮೇಲೆ ಇಟ್ಟೆ. ಅದರ ಮೇಲೆ ನಾಲ್ಕು–ನಾಲ್ಕು ಹಣತೆಗಳನ್ನ ಬೋರಲು ಮಲಗಿಸಿ ಸುಮಾರು ಮೂರು ಇಂಚು ಎತ್ತರದ ಮೂರು ಗುಪ್ಪೆ ಮಾಡಿದೆ. ಅದರ ಮೇಲೆ ಸಕ್ಕರೆ, ಚಾ ಪುಡಿ ಬೆರೆಸಿದ ಹಾಲು ಹಾಕಿದ ಚಿಕ್ಕ ಪಾತ್ರೆ ಇಟ್ಟೆ. ನನ್ನ ಮಿನಿ ಒಲೆ ತಯಾರಾಗಿತ್ತು. ಇನ್ನೂ ಒಲೆ ಉರಿಸಲು ರಟ್ಟಾಗಲಿ, ಮರದ ಚೂರಾಗಲಿ ಇಲ್ಲದ್ದರಿಂದ ಮುಂಬಯಿ ಮಿರರ್ರೇ ಗತಿ ಆಯಿತು. ಅದಕ್ಕೆ ಬೇರೆ ಸೀಮೆ ಎಣ್ಣೆ ವಾಸನೆ ಇದೆ ! ಪ್ರಿಂಟಿಂಗ್ ಇಂಕ್ ಗೆ ಏನು ಸೇರಿಸ್ತಾರೊ ಏನೋ. ಆದರೆ ಟೈಮ್ಸ್ ಅಲ್ವಾ, ಅವ್ರು ಹಾಗೆಲ್ಲಾ ಕಡಿಮೆ ಬೆಲೆ ಇಂಕ್ ಉಪಯೋಗಿಸೋದು ಸುಳ್ಳು ಅನ್ನಿಸ್ತು. ಅವರತ್ತಿರ ಬೇರೆ ಕೋಸ್ಟಲಿ ಮೆಷೆನರೀಸ್ ಇರುತ್ತೆ. ಪ್ರಿಂಟಿಂಗ್ ಡ್ರಮ್ ಹೋಗುತ್ತಲ್ವಾ…….. ಆದ್ರೆ ನಾನ್ಯಾಕೆ ಚಿಂತೆ ಮಾಡಲಿ ನಂಗೆ ಚಾ ರೆಡಿ ಆದ್ರೆ ಸಾಕಾಗಿತ್ತು.

ಹಾಗಾಗಿ ಮಿರರ್ ನ್ನು ಪೀಸ್ ಪೀಸ್ ಮಾಡಿ ಒಂದೊಂದೇ ಚೂರನ್ನು ಒಲೆಯ ಒಳಗೆ ನೂಕಿ ಬೆಂಕಿಯಲ್ಲಿ ಅದ್ದುತ್ತಾ ಕುಳಿತುಕೊಂಡೆ. ಸಖತ್ ಆಗಿತ್ತು. ತುಂಬಾ ಮಜಾ ಬಂತು. ಒಂದತ್ತು ನಿಮಿಷದಲ್ಲಿ ಚಾ ಕುದಿಯೊಕೆ ಶುರುವಾಯ್ತು. ಆಹಾ!   ನಿನ್ನೆ ಅಷ್ಟೇ ಫ್ರೆಂಡ್ ಹತ್ತಿರ MSEZ ವಿರುದ್ದ ಮಾತಾಡಿದ್ದು ನೆನಪಿಗೆ ಬಂತು. ಬದುಕೋಕೆ ನಿಜವಾಗಿಯೂ economic development ಬೇಕೇ ಬೇಕಾಗಿಲ್ಲ. ನಾವು ನೆಲ ಕಾಣದೆ ಇರೋ ಹಾಗೆ ಬೆಳೆತಿದ್ದೀವಿ ಅನ್ನಿಸ್ತು. ಇಕೊ ಫ್ರೆಂಡ್ಲಿ ಮನೆಗಳು, ಬಯೊ ಡೀಸೆಲ್ಲು,  ಕಾಡು ಮನುಷ್ಯರು ಎಲ್ಲ ನೆನಪಾಗ್ತಾ ಇತ್ತು. ಹೋಗಲಿ ಬಿಡಿ. ಮಿರರ್ ಚಾ ಹೈ ಕ್ಲಾಸ್ ಆಗಿತ್ತು. ಏನೋ ಹೊಸದು ಮಾಡಿದ ಥ್ರಿಲ್ ಇತ್ತು. ಕೆಂಡದಲ್ಲಿ ಸುಟ್ಟ ರೊಟ್ಟಿ ತುಂಬಾ ರುಚಿಯಂತೆ. ಹೌದಾ?

ಇನ್ನೂ ಗ್ಯಾಸ್ ಬಂದಿಲ್ಲ. ಅದಕ್ಕೆ ಮತ್ತೆ ಒಲೆ ಒಟ್ಟಿ ಮಿರರ್ ಸುಟ್ಟು ಹಾಲು ಕಾಯಿಸಿ ಬೂಸ್ಟ್ ಮಾಡಿ ಕುಡಿದು ಬರೀತಾ ಇದ್ದೀನಿ. ಫೋಟೋ ತೆಗೆಯೋಣ ಅಂದುಕೊಂಡೆ. ಎಲ್ಲಾದ್ರೂ ಇದು ಮನೆ ಓನರ್ ಕೈಗೆ ಸಿಕ್ಕಿದರೆ ! ಏನೋ educated ಅಂತ ಕೊಟ್ಟರೆ ಒಳ್ಳೇ uneducated ತರಹ ಮನೆ ಗೋಡೆ ಕಪ್ಪಗೆ ಮಾಡ್ತಿದ್ದೀರೇನ್ರಿ ಅಂತ ರೇಗಿದರೆ ? ಬೇಡಪ್ಪ ಬೇಡ. ಏನೋ ಒಂದ್ಸಲ ತರಲೆ ಐಡಿಯಾ ಬಂದು ಹಿಂಗೆ ಮಾಡಿದ್ದಕ್ಕೆ ಪರಮನೆಂಟ್ ಹಣೆ ಪಟ್ಟಿ ಪಡೆಯೊದಾ, ಅದಕ್ಕೆ ಹಾಗ್ತಿಲ್ಲ. ಜೊತೆಗೆ ಸಂಪ್ರದಾಯಸ್ಥರು ಚಿತ್ರ ನೋಡಿ, ದೀಪ ಹಚ್ಚೋ ಹಣತೆ ಉಪಯೋಗಿಸಿ ಯಾರಾದ್ರೂ ಬೆಂಕಿ ಹಚ್ಚತಾರಾ ಅಂತ ಹೀಗೆಳೆದರೆ? ಈ ರೇಜಿಗೆನೆ ಬೇಡರಿ. ಹಾಗೆನೆ ನೀವು ಸಹ ಇದನ್ನು ಯಾರಿಗೂ ಹೇಳಕೆ ಹೋಗ್ಬೇಡಿ. ಇದು ನಮ್ಮಿಬ್ಬರ ನಡುವಿನ ಗುಟ್ಟು, ಆಯ್ತಾ ?