ಬೆಂಕಿ

ಯಾರಾದರೂ ಇನ್ನು ಮುಂದೆ ಫೆಮನಿಸಂ ಅಂದ್ರೆ ಏನೂ ಅಂತ ಕೇಳಿದ್ರೆ ಫೈರ್ ಸಿನೆಮಾ ನೋಡಿ ಅನ್ನುತ್ತೇನೆ. ಈ ಸಿನೆಮಾದ ನಿರ್ದೇಶಕಿ ದೀಪಾ ಮೆಹ್ತಾ ಅಪ್ಪಟ ಫೆಮಿನಿಸ್ಟ. ಫೈರ್ ಹೊರನೋಟಕ್ಕೆ ಸಲಿಂಗ ಕಾಮಿಗಳ ಕತೆಯಂತೆ ತೊರುತ್ತದೆ. ನಿಜಕ್ಕೂ ಅದು ನಮ್ಮ ಪುರಾಣದ ಸೀತೆಯಂತಹ ಮತ್ತು ರಾಧೆಯಂತವರ ಕತೆ. ಧರ್ಮ, ಕಟ್ಟು ಪಾಡು, ರೀತಿ ನೀತಿಗಳು, ಪುರುಷ ಸಮಾಜ ಇವುಗಳೆಲ್ಲದರ ತತ್ವವನ್ನೇ ಪ್ರಶ್ನಿಸುವ ಇಬ್ಬರು ಹೆಣ್ಮಕ್ಕಳ ಕತೆ. ಪ್ರತಿಯೊಬ್ಬರಲ್ಲಿ ಅಡಗಿರುವ ಬೆಂಕಿಯ ಕತೆ.

ಇಲ್ಲಿನ ಅಜ್ಜಿಯೂ ನಮ್ಮ ಸನಾತನ ನಂಬಿಕೆ, ಮೌಲ್ಯಗಳಂತೆ ಜಡ್ಡು ಗಟ್ಟಿದ್ದಾಳೆ. ಮಾತೂ ಬಿದ್ದು ಹೋಗಿದೆ. ಏನಿದ್ದರೂ ಕೈಯಲ್ಲಿರುವ ಚಿಕ್ಕ ಗಂಟೆಯನ್ನು ಅಲುಗಾಡಿಸಿ ತನ್ನ ಭಾವಗಳನ್ನು ವ್ಯಕ್ತಪಡಿಸುತ್ತಾಳೆ. ಆಕೆಯ ಮಕ್ಕಳಾದ ಬಿಜಿಯ ಗಂಡ ಅಶೋಕ ಮತ್ತು ಸೀತಾಳ ಗಂಡ ಜತೀನ್ ಪುರುಷ ಸಮಾಜದ ಪ್ರತೀಕಗಳು. ಕತೆಯ ವಿಲನ್ ಮುಂಡು ಎನ್ನುವ ಮನೆಕೆಲಸದವ.

ರಾಧಾಳ ಗಂಡ ಅಶೋಕ ತನ್ನ ಹೆಂಡತಿ ಬಂಜೆಯೆಂದು ತಿಳಿದ ದಿನದಿಂದ ಮನಸ್ಸನ್ನು ಸನ್ಯಾಸದತ್ತ ಹೊರಳಿಸುತ್ತಾನೆ. ತನ್ನ ಕಾಮನೆಗಳನ್ನು ನಿಯಂತ್ರಿಸಿ ಸತ್ಯದ ಅರಿವು ಪಡೆಯಲು ಹೊರಡುತ್ತಾನೆ. ಬ್ರಹ್ಮಚರ್ಯ ಪಾಲಿಸುವ ಆತನಿಗೆ ತನ್ನ ಇಂದ್ರೀಯ ನಿಗ್ರಹ ಪರೀಕ್ಷಿಸಲು ರಾಧಾಳ ಸಹಾಯ ಬೇಕು. ಒಮ್ಮೆ ರಾಧಾ ಆತನಲ್ಲಿ ಕೇಳುತ್ತಾಳೆ, ನಿನಗೆ ಇದರಿಂದ ಸತ್ಯದ ದರ್ಶನವಾಗುತ್ತದೆ, ಆದರೆ ನನಗೆ ಏನು ಸಿಗುತ್ತದೆ ಎಂದು. ಅದಕ್ಕೆ ಅಶೋಕ ನೀನು ನನ್ನ ಪತ್ನಿಯಾಗಿ ನಿನ್ನ ಕರ್ತವ್ಯ ಮಾಡುತ್ತಿದ್ದಿಯಾ. ಅಷ್ಟೆ ಎಂದು ಬಿಡುತ್ತಾನೆ. ಗಂಡನಿಗೆ ಒಳಿತಾದರೆ ಹೆಂಡತಿಗೂ ಒಳಿತು ಎಂಬ ಸನಾತನ ನಂಬಿಕೆಯನ್ನು ಬಲವಂತವಾಗಿ ಆಕೆಯ ಮೇಲೆ ಹೊರಿಸುತ್ತಾನೆ. ಹೀಗೆ ತನ್ನ ಕಾಮನೆಗಳನ್ನು ಸುಡಲು ಯತ್ನಿಸುತ್ತ, ವಯಸ್ಸಾದ ಅತ್ತೆಯನ್ನು ಅಕ್ಕರೆಯಿಂದ ನೋಡಿಕೊಳ್ಳುತ್ತ ಇರುತ್ತಾಳೆ. ನನ್ನ ಲೆಕ್ಕದಲ್ಲಿ ಇದು ಆಕೆ ಗಂಡನ ತಾಯಿ ಅಂದರೆ ಸನಾತನ ಮೌಲ್ಯಗಳನ್ನು ಒಪ್ಪಿಕೊಳ್ಳುತ್ತಿರುವುದಾಗಿದೆ. ಹೀಗೆ ಸಾಗುತ್ತಿದ್ದ ಆಕೆಯ ಬದುಕಲ್ಲಿ ಆಕೆಯ ಮೈದುನನ ನವ ವಧು ಸೀತಾಳ ಪ್ರವೇಶವಾಗುತ್ತದೆ.

ಸೀತಾ ಕ್ರಾಂತಿಕಾರಿ ಮನೋಭಾವದವಳು. ಜರಿ ಸೀರೆ ಬೀಸಾಕಿ ಗಂಡನ ಪ್ಯಾಂಟ್ ಧರಿಸಿ ಹಾಡು ಹಾಕಿ ಕನ್ನಡಿಯ ಎದುರಿಗೆ ನರ್ತಿಸುವಳು. ತನ್ನ ಸಲುವಾಗಿ ಬದುಕುವುದರಲ್ಲಿ ಯಾವುದೇ ತಪ್ಪಿಲ್ಲ ಎಂದು ನಂಬಿರುವಳು. ಎಲ್ಲ ಕಟ್ಟುಪಾಡುಗಳು, ಆಚರಣೆಗಳು ಹೆಣ್ಣಿಗೆ ಮಾತ್ರ ಏಕೆ ಎಂದು ಪ್ರಶ್ನಿಸುವಳು. ಆಕೆಯ ಗಂಡ ಜತೀನನಿಗೆ ಇದು ಒತ್ತಾಯದ ಮದುವೆ.  ಆತ ತನ್ನ ಪ್ರೇಯಸಿ ಚೀನಿ ಹುಡುಗಿಯ ಜೊತೆಗಿರುತ್ತಾನೆ. ಈ ಸತ್ಯವನ್ನು ಸೀತಾ ಬಹುಬೇಗ ಜೀರ್ಣಿಸಿಕೊಂಡು ಬಿಡುತ್ತಾಳೆ. ಮೊದಲು ಹೆಂಡತಿಯನ್ನು ಮುಟ್ಟದ ಜತೀನ ನಂತರ ಅಣ್ಣ ಅಶೋಕನ ಮಾತಿನ ಮೇರೆಗೆ ಸೀತಾಳನ್ನು ಒಪ್ಪುತ್ತಾನೆ. ಆದರೆ ಸೀತಾಳನ್ನು ದೈಹಿಕವಾಗಿ, ಮಾನಸಿಕವಾಗಿ ತೃಪ್ತಿ ಪಡಿಸುವ ಗೊಡೆಗೆ ಹೋಗದೆ ಆಕೆಗೆ ಮಗು ಮಾಡಿಕೊಡುವುದಷ್ಟೆ ಗಂಡನಾದ ತನ್ನ ಕರ್ತವ್ಯ ಎಂದು ತಿಳಿದಿರುತ್ತಾನೆ. ಅದು ತಾನು ಆಕೆಗೆ ಮಾಡುತ್ತಿರುವ ಉಪಕಾರ ಎಂದುಕೊಂಡಿರುತ್ತಾನೆ.

ಪ್ರತಿ ರಾತ್ರಿ ಅಶೋಕ ಸ್ವಾಮಿಜಿಯಲ್ಲಿ ತೆರಳಿದರೆ ಜತೀನ ತನ್ನ ಪ್ರೇಯಸಿಯ ಬಳಿ. ಮನೆಯಲ್ಲಿ ಉಳಿಯುವ ಈ ಇಬ್ಬರೂ ಒಂಟಿ ಜೀವಿಗಳು ತಮ್ಮ ಸಹಜವಾದ ದೈಹಿಕ ಬಯಕೆಗಳಿಂದ ಪಾರಾಗಲು ಒಬ್ಬರನ್ನೊಬ್ಬರು ಆಶ್ರಯಿಸತೊಡಗುತ್ತಾರೆ. ಮಾನಸಿಕವಾಗಿ, ದೈಹಿಕವಾಗಿ ಹತ್ತಿರವಾಗುತ್ತ ಸಾಗುತ್ತಾರೆ. ಇಬ್ಬರಿಗೂ ತಾವು ಮಾಡುತ್ತಿರುವುದು ತಪ್ಪೆನಿಸುವುದಿಲ್ಲ. ಅತ್ತ ರಾಧಾ ಅಶೋಕನ ಸಂಯಮ ಪರೀಕ್ಷೆಯಲ್ಲಿ ಭಾಗಿಯಾಗುವುದನ್ನು ನಿಲ್ಲಿಸುತ್ತಾಳೆ. ಅತ್ತೆಗೆ ತಿಂಡಿ ತಿನ್ನಿಸುವುದನ್ನು ಅಶೋಕನಿಗೆ ಒಪ್ಪಿಸುತ್ತಾಳೆ. ಇತ್ತ ಸೀತೆ ಜತೀನನ ಉಪಕಾರವನ್ನು ಬೇಡವೆನ್ನುತ್ತಾಳೆ. ಗಂಡಂದಿರಿಗೆ ಇವರಿಬ್ಬರ ಸಂಬಂಧ ಅರಿವಾಗದಿದ್ದರೂ ಆ ಮನೆಯಲ್ಲಿ ಇಬ್ಬರು ಮೂಕ ಸಾಕ್ಷಿಗಳು; ಮಾತು ಬರದ ಅಜ್ಜಿ ಮತ್ತು ಈ ಬಗ್ಗೆ ಮಾತಾಡಲಾರದ ಇಕ್ಕಟ್ಟಿಗೆ ಸಿಲುಕಿರುವ ಮುಂಡು.

ಮನೆಗೆ ಕೆಳಗೆ ಇವರ ಹೋಟೆಲ್ ಇರುತ್ತದೆ. ಸೀತಾ, ರಾಧಾ, ಮುಂಡು ಸೇರಿ ಅಡುಗೆ ಮಾಡಿದರೆ, ಅಶೋಕಂದು ಕ್ಯಾಶಿಯರ್ + ಸಪ್ಲೆಯರ್ ಕೆಲಸ. ಅದಕ್ಕೆ ತಾಗಿ ಜತಿನನ ಸಿಡಿ ಲೈಬ್ರರಿ ಇರುತ್ತದೆ. ಜತಿನ ಪೊರ್ನ್ ವಿಡಿಯೊಗಳನ್ನು ಮನೆಯವರಿಗೆ ಗೊತ್ತಾಗದಂತೆ ಸಪ್ಲೆಯ್ ಮಾಡುತ್ತಿರುತ್ತಾನೆ. ಅಜ್ಜಿಗೆ ರಾಮಾಯಣ ನೋಡಲು ಇಷ್ಟ. ಮನೆಯಲ್ಲಿ ಯಾರೂ ಇಲ್ಲದಾಗ ಅಜ್ಜಿಗೆ ರಾಮಾಯಣ ತೋರಿಸುವ ನೆಪದಲ್ಲಿ ಮುಂಡು ಪೋರ್ನ್ ವಿಡಿಯೊ ನೋಡುತ್ತಾನೆ. ಅಜ್ಜಿಗೆ ಮಾತು ಬರದಿದ್ದರಿಂದ ಆಕೆ ಅಸಾಹಯಕಳಾಗಿ ಅವನ ಆಟಗಳನ್ನು ನೋಡುತ್ತಾಳೆ. ಒಂದು ದಿನ ಮುಂಡು ರಾಧಾಳ ಕೈಗೆ ರೆಡ್ ಹ್ಯಾಂಡ್ ಆಗಿ ಸಿಗುತ್ತಾನೆ. ಸಿಟ್ಟಿನಲ್ಲಿ ಆತನ ಕೆನ್ನೆಗೆ ಹೊಡೆಯುತ್ತಾಳೆ. ಆಗ ಆತ ಕೇಳುತ್ತಾನೆ, ಇಡೀ ದಿನ ಕೆಲಸ ಮಾಡುವ ನಾನು ಈ ಸಣ್ಣ ಖುಷಿ ಪಟ್ಟರೆ ತಪ್ಪು ಅನ್ನುತ್ತೀರಾ, ಆದರೆ ನೀವಿಬ್ಬರೂ ನಡೆಸುತ್ತಿರುವುದು ಸರಿಯಾ ಎಂದು. ರಾಧಾ ದಂಗಾಗುತ್ತಾಳೆ.  ನೈತಿಕ/ಅನೈತಿಕತೆಯ ಪ್ರಶ್ನೆ ಇದು. ಈ ಸಮಾಜದಲ್ಲಿ ಕೇವಲ ಸ್ವಂತದ ಬಗ್ಗೆ ಯೋಚಿಸುವುದು ಹೇಗೆ ತಪ್ಪಾಗಿಬಿಡುತ್ತದೆ ಎಂದು ಕೊರಗುತ್ತಾಳೆ. ಎಲ್ಲರಿಗೂ ವಿಷಯ ಗೊತ್ತಾಗಿ ಕೊನೆಯಲ್ಲಿ ಅಶೋಕ ತಪ್ಪು ಒಪ್ಪಿಕೊಂಡವರನ್ನು ಮುನ್ನಿಸಬೇಕೆಂದು ಧರ್ಮದಲ್ಲಿ ಹೇಳಿದೆ ಎಂದು ಆತನನ್ನು ಕ್ಷಮಿಸಿ ಬಿಡುತ್ತಾನೆ.

ಮುಂಡುಗೆ ರಾಧಾಳ ಮೇಲೆ ಆಸೆಯಿರುವುದರಿಂದ ಆತನಿಗೆ ಸೀತಾ ಮತ್ತು ರಾಧಾಳ ನಡುವಿನ ಬೆಳೆಯುತ್ತಿರುವ ಸಂಬಂಧ ಇಷ್ಟವಾಗುವುದಿಲ್ಲ. ಒಂದು ದಿನ ತಡೆಯಲಾಗದೆ ಆಶ್ರಮದಲ್ಲಿದ್ದ ಅಶೋಕನ ಬಳಿ ಹೋಗಿ ಸತ್ಯ ಹೇಳಿಬಿಡುತ್ತಾನೆ. ಮೊದಲು ನಂಬದ ಅಶೋಕ ಮನೆಗೆ ತೆರಳಿ ತನ್ನ ಕಣ್ಣಿನಿಂದಲೇ ನೋಡಿ ಶಾಕ್ ಆಗುತ್ತಾನೆ. ಮನೆಯಿಂದ ಹೊರ ಬಂದು ಬೀದಿಯಲ್ಲಿ ಕುಕ್ಕರಿಸುತ್ತಾನೆ. ಪದೇ ಪದೇ ತಾನು ಕಂಡದ್ದು ನೆನಪಾಗಿ ಮೈ ಬಿಸಿಯಾಗುತ್ತದೆ, ತನ್ನ ಸಂಯಮ ಮೀರುತ್ತಿರುವುದು ಅರಿತು ಬಿಕ್ಕುತ್ತಾನೆ. ಇತ್ತ ಸತ್ಯ ಬಯಲಾಗುತ್ತಿದ್ದಂತೆ ಸೀತಾ ಮತ್ತು ರಾಧಾ ಮೊದಲು ನಿಶ್ಚಯ ಮಾಡಿಕೊಂಡಂತೆ ಮನೆಯಿಂದ ಹೊರ ಬೀಳಲು ತೀರ್ಮಾನಿಸುತ್ತಾರೆ. ರಾಧಾ ತಾನು ಅಶೋಕನ ಬಳಿ ಹೇಳಿ ಬರುತ್ತೇನೆ ಎಂದು ಸೀತೆಯನ್ನು ಮುಂದೆ ಕಳಿಸುತ್ತಾಳೆ. ವಾಪಸ್ಸು ಬಂದ ಅಶೋಕ ರಾಧಾಳ ಬಳಿ ಕೋಣೆಗೆ ಬರ ಹೇಳುತ್ತಾನೆ. ಮತ್ತೊಮ್ಮೆ ಪರೀಕ್ಷೆಗೆ ಸಹಾಯ ಬೇಕೆನ್ನುತ್ತಾನೆ. ರಾಧಾ ಬರುವುದಿಲ್ಲ. ತಾನು ಹೋಗುತ್ತಿರುವುದಾಗಿ ತಿಳಿಸುತ್ತಾಳೆ. ಅಶೋಕ ಆಕೆ ಮಾಡಿದ್ದು ಪಾಪ. ಇದರಿಂದ ಹೊರಬರಲು ಸ್ವಾಮೀಜಿಯ ಬಳಿ ಹೋಗೋಣ ಎನ್ನುತ್ತಾನೆ. ಕಾಮನೆಗಳು ತಪ್ಪು ದಾರಿಗೆ ಏಳೆಯುತ್ತವೆ ಎಂದು ತಿಳಿ ಹೇಳುತ್ತಾನೆ. ಅವನ ಮಾತು ಒಪ್ಪದ ರಾಧೆ ಕಾಮನೆಗಳೇ ಇಲ್ಲದೆ ತಾನು ಮೊದಲು ಸತ್ತು ಹೋಗಿದ್ದೆ. ಈಗ ಸೀತೆ ತನ್ನಲ್ಲಿ ಅವುಗಳನ್ನು ಹುಟ್ಟಿಸಿದ್ದಾಳೆ. ಕಾಮನೆಗಳನ್ನು ಹೊಸಕಿ ಬದುಕುವುದನ್ನೇ ಜೀವನ ಎಂದು ತಿಳಿದಿದ್ದರೆ ನೀನೆ ಸ್ವಾಮಿಜಿಯ ಸಹಾಯ ತೆಗೆದುಕೊ, ತನಗೆ ಬೇಡ ಅನ್ನುತ್ತಾಳೆ. ಕೋಪದಲ್ಲಿ ಸಂಯಮ ಕಳೆದುಕೊಂಡ ಅಶೋಕ ಆಕೆಗೆ ಮುತ್ತಿಕ್ಕುತ್ತಾನೆ. ಇದೇ ಅಲ್ಲವೇ ನಿನಗೆ ಬೇಕಿದ್ದು ಎನ್ನುತ್ತಾನೆ. ತಕ್ಷಣ ಆದ ಘಟನೆ ನೆನಪಿಗೆ ಬಂದು ಏಂತಹ ಹೆಣ್ಣಾಗಿದ್ದಿಯಾ ನೀನು, ತಪ್ಪು ಮಾಡಿದ್ದಿಯಾ, ನನ್ನ ಕಾಲು ಹಿಡಿದು ಕ್ಷಮಾಪಣೆ ಕೇಳು ಎಂದು ಕೂಗುತ್ತಾನೆ. ಮೊದಲ ಬಾರಿ ಮಾತು ಕೇಳದ ಹೆಂಡತಿಯ ಮೇಲೆ ಅಸಹನೆ, ಅಸಮಾಧಾನ. ರಾಧಾ ನಿರುತ್ತಳಾಗಿರುತ್ತಾಳೆ. ಅದೇ ಹೊತ್ತಿಗೆ ಸೆರಗು ಗ್ಯಾಸಿನ ಮೇಲೆ ಬಿದ್ದು ಬೆಂಕಿ ಹತ್ತಿಕೊಳ್ಳುತ್ತದೆ.

ಈ ಸಿನೆಮಾದಲ್ಲಿ ಬೆಂಕಿಯನ್ನು ಪ್ರತಿಮೆಯಂತೆ ಬಳಸಿಕೊಳ್ಳಲಾಗಿದೆ. ಕತೆಯಲ್ಲಿ ರಾಮಾಯಣ ಮಧ್ಯ ಮಧ್ಯ ಬರುತ್ತದೆ. ಒಂದು ಸನ್ನಿವೇಶ ಹೀಗಿದೆ. ಅಶೋಕನ ಸ್ವಾಮಿಜಿಯ ಆಶ್ರಮದಲ್ಲಿ ರಾಮಾಯಣ ನಾಟಕ ನಡೆದಿರುತ್ತದೆ. ಸೀತೆಯ ಅಗ್ನಿಪರೀಕ್ಷೆಯ ಪ್ರಸಂಗ. ಪುಟ್ಟ ಮಗು ಹಿಡಿದ  ಹೆಂಗಸಿನ ಕಣ್ಣಲ್ಲೂ ನೀರು. ಅಶೋಕನ ಕಣ್ಣಲ್ಲಿ, ಎಲ್ಲರ ಕಣ್ಣಲ್ಲೂ ನೀರು. ಅಗ್ನಿಪರೀಕ್ಷೆಯನ್ನು ಗೆದ್ದು ಬಂದ ಸೀತೆಯಲ್ಲಿ ರಾಮ, ನೀನು ಶುದ್ಧಳಿರುವುದು ನನಗೆ ತಿಳಿದಿದೆ. ಆದರೂ ಸಹ ನಾನು ನಿನ್ನನ್ನು ಕಾಡಿಗೆ ಕಳುಹಿಸುತ್ತೇನೆ ಎಂದು ಹೇಳುತ್ತಾನೆ. ಸೀತೆ ವಿಷಾದದಿಂದ ಲಕ್ಷ್ಮಣನ ಜೊತೆ ಕಾಡಿಗೆ ತೆರಳುತ್ತಾಳೆ. ಆಗ ಅಲ್ಲಿದ್ದ ಸ್ವಾಮೀಜಿ “ಪಾಪ ರಾಮ” ಅನ್ನುತ್ತಾನೆ! ಚಿತ್ರದ ಕ್ಲೈಮಾಕ್ಸನಲ್ಲಿ ರಾಧಾ ಸಹ ಅಗ್ನಿ ಪರೀಕ್ಷೆ ಕೊಡುತ್ತಾಳೆ.

ಇಡೀ ಸೀರೆಗೆ ಬೆಂಕಿ ಹಬ್ಬಲಾರಂಬಿಸುತ್ತದೆ. ಆಕೆ ಆರಿಸುವ ಪ್ರಯತ್ನ ಮಾಡುತ್ತಾಳೆ. ಎದುರಿಗೆ ಇದ್ದ ಅಶೋಕ ಆಕೆಗೆ ಸಹಾಯ ಮಾಡದೆ ಕೆಳಗೆ ಬಿದ್ದ ತನ್ನ ತಾಯಿಯನ್ನು ಹೊತ್ತು ತೆರಳುತ್ತಾನೆ. ನನ್ನ ಲೆಕ್ಕದಲ್ಲಿ ತನ್ನ ಸನಾತನ ನಂಬಿಕೆಗಳನ್ನು ಎತ್ತಿ ಅದನ್ನು ಒಪ್ಪದ ರಾಧಾಳನ್ನು ಬೆಂಕಿಯಲ್ಲಿ ಸಾಯಲು ಬಿಟ್ಟು ಹೋಗುವುದು. ಆಗ ರಾಧಾ ಆತನನ್ನು ನೋಡುವ ಭಾವ ನೋಡಬೇಕು. ಕೊನೆಯಲ್ಲಿ ರಾಧಾ ಸಹ ಅಗ್ನಿ ಪರೀಕ್ಷೆಯಲ್ಲಿ ಗೆದ್ದು ತನಗಾಗಿ ದರ್ಗಾದ ಹತ್ತಿರ ಕಾಯುತ್ತಿದ್ದ ಸೀತಾಳ ಬಳಿಗೆ ಬರುತ್ತಾಳೆ. ಅವರಿಬ್ಬರೂ ಒಬ್ಬರನ್ನೊಬ್ಬರನ್ನು ಸಂತೈಸಿಕೊಳ್ಳುವ ದೃಶ್ಯದೊಂದಿಗೆ ಚಿತ್ರ ಮುಗಿಯುತ್ತದೆ.

ನಾನು ಎಲ್ಲ ಹಿಂದಿ ಮೂವಿಯ ತರಹ ಕೊನೆಯಲ್ಲಿ ಸೀತಾ-ಜತೀನ್, ಅಶೋಕ-ರಾಧಾ ಒಂದಾಗಿ ಬಿಡುತ್ತಾರೆನೋ ಅಂತ ಕುತೂಹಲದಿಂದ ಕೂತಿದ್ದೆ. ಬಚಾವ್, ಹಾಂಗಾಗಲಿಲ್ಲ. ಇದು ದೀಪಾ ಮೆಹ್ತಾ ಮೂವಿ ಅಂತ ನೆನಪಿಗೆ ಬಂತು.

ಮೆಹ್ತಾಳ ವಾಟರ್ ನನಗೆ ಅಷ್ಟು ಹಿಡಿಸಿರಲಿಲ್ಲ. ಅದರಲ್ಲಿನ ಜಾನ್ ಅಬ್ರಹಾಂ ಮತ್ತು ಲಿಸಾ ರೈಯ ನಟನೆಗಳಿಂದ. ಫೈರ್ ನಲ್ಲಿ ಇರುವುದು ಕಾಡಿಗೆ ಕಣ್ಣಿನ ಶಬಾನ ಆಜ್ಮಿ ಮತ್ತು ನಂದಿತಾ ದಾಸ್. ಆ ಕಾರಣಕ್ಕೆ ಸಿನೆಮಾ ವೀಕ್ಷಕನಿಗೆ ಹೊಸ ಆಯಾಮಗಳನ್ನು ಕೊಡುತ್ತ ಹೋಗುತ್ತದೆ.

( ಸಿನೆಮಾದಲ್ಲಿ ಸೀತೆಯ ಹೆಸರನ್ನು ಸೆನ್ಸಾರ್ ಬೋರ್ಡ ಆದೇಶದಂತೆ ನೀತಾ ಎಂದು ತಿದ್ದಲಾಗಿದೆ)

Eva, Eva!, Eva?, Eva?!, Eev, Eeeeva, Evaaaaaaa…

ಬಾಯಿ ಇಲ್ಲದೆಯೂ ಒಂದು ಕ್ಯಾರೆಕ್ಟರ್ ಸೃಷ್ಟಿ ಮಾಡಬಹುದೇ ? ನನ್ನ ಕೈನಲ್ಲಿ ಕಲ್ಪನೆನೂ ಮಾಡಕ್ಕೆ ಆಗ್ತಾ ಇಲ್ಲ. ಕಣ್ಣಿನಲ್ಲಿ ಭಾವನೆಗಳನ್ನು ಸೂಚಿಸಬಹುದಾದರೂ ಮಾತನಾಡಲು ಬಾಯಿಯೇ ಇಲ್ಲದಿದ್ರೆ, ಅಬ್ಬಬ್ಬಾ! ಕೈ ಇಲ್ಲದೇನೆ ಎಕ್ಟ್ ಮಾಡಿಸುವುದನ್ನು Carsನಲ್ಲಿ ನೋಡಿದ್ದೆ. ಆದ್ರೆ ಮೊನ್ನೆ ನೋಡಿದ್ದು ಇನ್ನೂ ಡಿಫರೆಂಟ್ ಆಗಿತ್ತು. ಇಲ್ಲಿ ಸಿನೆಮಾದ ಕ್ಯಾರೆಕ್ಟರಿಗೆ ಮನುಷ್ಯನನ್ನು ಹೋಲುವ ಕಣ್ಣೂ ಇಲ್ಲ, ಬಾಯಿ ಅನ್ನೊ ಅಂಗವೇ ಇಲ್ಲ. ಆಹಾಹಾ! ಹುಂ ಕಣ್ರಿ, Wall-Eನಲ್ಲಿನ ಹೀರೊ ಸ್ವಯಂ ಚಾಲಿತ ಯಂತ್ರ ; ತ್ಯಾಜ್ಯವನ್ನು ಕಂಪ್ರೆಸ್ ಮಾಡಿ, ಆ ಕಸದ ಇಟ್ಟಿಗೆ ಚೌಕಗಳಿಂದ ತ್ಯಾಜ್ಯದ ಗೋಪುರ ಕಟ್ಟುವ ರೊಬೋಟ್. ಅದಕ್ಕೆ ಚೌಕದ ಕಂಪ್ರೆಸರ್ ದೇಹ, ಬಂಕರ್ ಚಕ್ರಗಳೆಂಬ ಕಾಲುಗಳು, ಡಿಗ್ ಮಾಡುವ ಕೈಗಳು ಮತ್ತು ಬರೀ ಎರಡು ಕ್ಯಾಮೆರ ಲೆನ್ಸ್  ಕಣ್ಣುಗಳನ್ನು ಹೊಂದಿದ ಮುಖ! ಆದರೂ ಅದೇಷ್ಟು human ಅಂತ ಅನ್ನಿಸಿಬಿಡುತ್ತೆ ಗೊತ್ತಾ. ಅದರ ಹಾಗೇನೆ ಹೀರೊಯಿನ್ ರೊಬೊಟ್ ಇವಾ ಕೂಡ. ವಾಲ್ ಇ ಇವಾಳ ಎದುರು ಎಣ್ಣೆ ಹಚ್ಚಿ ಕ್ರಾಪ್ ಮಾಡಿದ ಓಲ್ಡ್ ಮಾಡೆಲ್ ಹುಡುಗನ ತರಹ ( ರಸ್ಟಿಕ್ – ರೆಕ್ಟಾಂಗ್ಯುಲರ್) . ಇವಾ ಬೆಳ್ಳನೆಯ ಅಂದವಾದ ದೇಹವುಳ್ಳ, ಕಿಲ ಕಿಲನೆ ನಗುವ ಹುಡುಗಿ ತರಹ ( ಸೊಫೆಸ್ಟಿಕೇಟೆಡ್ – ಸ್ಲೀಕ್ ಮಾಡೆಲ್ ) .

Wall-E ಸಿನೆಮಾ ಇವರಿಬ್ಬರ ಲವ್ ಸ್ಟೋರಿ. ಹೀರೊ-ಹೀರೊಯಿನ್ ಇಬ್ಬರಿಗೂ ಬಾಯಿ ಇಲ್ಲದ್ದರಿಂದ ಅವರಿಬ್ಬರನ್ನೂ  fall in Love ಅಂತ ತೋರಿಸೊಕೆ ಕಿಸ್ ಕೊಡಿಸೊಕೆ ಆಗಲ್ಲ. ಅದಕ್ಕೆ ಇಲ್ಲಿ ಒಬ್ಬರ ಕೈಯನ್ನು ಇನ್ನೊಬ್ಬರು ಹಿಡಿಯೊದನ್ನು ತುಂಬಾ ರೊಮ್ಯಾಂಟಿಕ್ ಆಗಿ ಬಳಸಲಾಗಿದೆ. ಹಳೇ ಕ್ಯಾಸೆಟಿಂದ ಟಿವಿ ಪರದೆಯ ಮೇಲೆ ಮೂಡುವ ಮನುಷ್ಯರು ಟೋಪಿ ಎಸೆದು ಡಾನ್ಸ್ ಮಾಡುತ್ತ ಅಂತ್ಯದಲ್ಲಿ ಬೆರಳುಗಳನ್ನು ಬೆಸೆದು ಸಾಂಗತ್ಯವನ್ನು, ಪ್ರೀತಿಯನ್ನು ವ್ಯಕ್ತ ಪಡಿಸೋದನ್ನು ನಮ್ಮ ವಾಲ್ ಇ ಎಷ್ಟು passionate ಆಗಿ ನೋಡುತ್ತೆ ಗೊತ್ತಾ. ಅದಕ್ಕೂ ಯಾರ ಜೋಡಿಯಾದರೂ ಕೈ ಹಿಡಿದು ನಡೆಯೊ ಆಸೆ. ಆದ್ರೆ ಅದು ಸಾಧ್ಯವಿಲ್ಲ. ಏಕೆ ಅಂದ್ರೆ ……

ನಮ್ಮ ಭೂಮಿ ಫುಲ್ ಕಸದ ತೊಟ್ಟಿಯಾಗಿ ಹೋಗಿದೆ. ತ್ಯಾಜ್ಯದ ರಾಶಿಯಿಂದ ಹೊರಸೂಸುತ್ತಿರುವ ವಿಷಾನಿಲ ಮನುಷ್ಯರನ್ನು ಪೃಥ್ವಿಯಿಂದ ಅಂತರಿಕ್ಷಕ್ಕೆ ಕಳಿಸಿದೆ. ಜೀವರಾಶಿಯೇ ಇಲ್ಲದ ಭೂಮಿಯಲ್ಲಿ ಕೆಲಸ ಮಾಡುತ್ತಿದ್ದ ಎಲ್ಲ ರೊಬೊಟ್ ಗಳು ಶಿಥಿಲಗೊಂಡು ಕೇವಲ್ ವಾಲ್ ಇ ಮಾತ್ರ ಬದುಕಿಕೊಂಡಿದೆ. ಸವೆದ ತನ್ನ ಅಂಗಾಗಳನ್ನು ಸತ್ತ ಇತರ ರೊಬೊಟ್ ಗಳಿಂದ ತಂದು ಜೋಡಿಸಿಕೊಳ್ಳುತ್ತ ತನ್ನಷ್ಟಕ್ಕೆ ಗುನುಗುತ್ತ, ಶಿಳ್ಳೆ ಹೊಡೆಯುತ್ತ ಬದುಕಿಕೊಂಡಿದೆ. ಅದಕ್ಕಿರುವ ಒಂದೇ ಒಂದು ಕಂಪನಿ ಅಂದರೆ ಅದರ ಸಾಕು ಜಿರಳೆ!

ಇಂತಿಪ್ಪ ಒಂದು ದಿನ ಆಕಾಶದಿಂದ ಬಂದ ರಾಕೆಟ್ ಒಂದು ಇವಾಳನ್ನು ನಮ್ಮ ವಾಲ್ ಇ ಇರುವ ಜಾಗಕ್ಕೆ ಇಳಿಸಿ ಹೋಗುತ್ತದೆ. ನೀವು ಇವಾಳನ್ನು ಧರೆಗಿಳಿದ ಅಪ್ಸರೆ ಅಂತನೂ ಅಂದುಕೊಳ್ಳಬಹುದು;) ನಮ್ಮ ವಾಲ್ ಇ ಇವಾಳ ಹಿಂದೆ ಬೀಳುತ್ತಾನೆ. ಅವಳನ್ನು ಒಲಿಸಿಕೊಳ್ಳಲು ಹರಸಾಹಸ ಮಾಡುತ್ತಾನೆ. ಇವಾ ಸುಂದರಿಯಾಗಿದ್ದರೂ ಸಹ ಭಯಂಕರ ಸಿಟ್ಟಿನವಳು. ಅಪಾಯ ಅಂದಾಕ್ಷಣ ಕೈಯಲ್ಲಿನ ಲೇಸರ್ ಕಿರಣಗಳನ್ನು ಹಾಯಿಸಿ ಎತ್ತರೆತ್ತರ ಬೆಂಕಿ ಉಗುಳಿಸಬಲ್ಲಳು. ಅಂತಹ ಕೈಯನ್ನೇ ಮುಟ್ಟಿ ವಾಲ್ ಇ ತನ್ನ ಸ್ನೇಹವನ್ನು ತೋರಿಸ ಬಯಸುತ್ತಾನೆ.  ಹೀಂಗಿರುವ ಡೆಂಜರಸ್ ನಾಯಕಿಯನ್ನು ನಮ್ಮ ಬಡಪಾಯಿ ಸಾಧು ಹೀರೊ ಮನೆಗೆ ಕರೆತರುತ್ತಾನೆ. ವಾಲ್ ಇ ಗೂ ಹಳೆ ಇಂಟರೆಸ್ಟಿಂಗ್ ವಸ್ತುಗಳನ್ನು ಸಂಗ್ರಹಿಸುವ hobby ಇರುತ್ತದೆ. ಇವಾಳನ್ನು ಇಂಪ್ರೆಸ್ ಮಾಡಲು ತಾನು ಕಲೆ ಹಾಕಿದ ಗಿಡವೊಂದನ್ನು ತೋರಿಸುತ್ತಾನೆ. ಸಕತ್ ಖುಷಿಯಾದ ಇವಾ ಅದನ್ನು ತನ್ನ ಹೊಟ್ಟೆಗೆ ತುರುಕಿಕೊಂಡು ತಟಸ್ಥಳಾಗುತ್ತಾಳೆ. ಜೀವಂತ ಇದ್ದಾಳೆ ಅನ್ನುವುದಕ್ಕಾಗಿ ಕೇವಲ ಬೀಪ್ ಶಬ್ದ ಬರುತ್ತಿರುತ್ತದೆ. ಪಾಪದ ವಾಲ್ ಇ. ಏಷ್ಟೋ ವರ್ಷಗಳ ನಂತರ ಸಿಕ್ಕ ಜೊತೆಗಾರ್ತಿ ಇದ್ದಕ್ಕಿದ್ದಂತೆ ಮಾತೇ ಆಡ್ತಾ ಇಲ್ಲ…….. ಅವಳನ್ನು ನಿದ್ದೆಯಿಂದ ಎಬ್ಬಿಸಲು ಏನೂ ಮಾಡಿದರೂ ಸಾಧ್ಯವಾಗುವುದಿಲ್ಲ. ಕೊನೆಗೊಂದು ದಿನ ಮತ್ತೆ ಬಂದ ರಾಕೆಟ್ ಇವಾಳನ್ನು ಜೊತೆಗೆ ಕರೆದುಕೊಂಡು ಹೋಗುತ್ತೆ. ಇವಾಳನ್ನು ಬಚಾವ್ ಮಾಡಲು ಬಂದ ವಾಲ್ ಇ ರಾಕೆಟ್ ಜೊತೆಗೆ ಅಂತರಿಕ್ಷಕ್ಕೆ ಜಿಗಿಯುತ್ತಾನೆ. ಆ ರಾಕೆಟ್ ಇಬ್ಬರನ್ನೂ ಸೀದಾ ಎಕ್ಸಿಯಮ್ ಎಂಬ ಅಂತರಿಕ್ಷ ನೌಕೆಗೆ ಕರೆದೊಯ್ಯುತ್ತದೆ. ಮನುಷ್ಯರು ವಾಸಿಸುವ ಅಲ್ಲಿಂದ ವಾಲ್ ಇ ಇವಾಳನ್ನು ಹೇಗೆ ರಕ್ಷಿಸಿ ವಾಪಸ್ಸು ಮನೆಗೆ ಕರೆದುಕೊಂಡು ಬರುತ್ತಾನೆ, ಇವಾ ಗಿಡ ತೆಗೆದುಕೊಂಡಾಕ್ಷಣ ಕೋಮಾಕ್ಕೆ ಹೋಗಿದ್ದೇಕೆ , ಅದಕ್ಕೂ ಮನುಷ್ಯರಿಗೂ ಏನು ಸಂಬಂಧ, ಆಕೆಯೂ ವಾಲ್ ಇ ಯನ್ನು ಪ್ರೀತಿಸಿದಳಾ……….. ಇವೆಲ್ಲ ಗೊತ್ತಾಗಬೇಕಿದ್ರೆ ಫಿಲ್ಮ್ ನೋಡಿ:D

ವಾಲ್ ಇ ಕೋಮಾದಲ್ಲಿರುವ ಇವಾಳನ್ನು ಕರೆದುಕೊಂಡು ಬೋಟಿನಲ್ಲಿ ಹೋಗುವುದು, ಆಕೆಯನ್ನು ಲೈಟಿನ ಸರದಲ್ಲಿ ಬಂದಿಸಿ ಎಳೆಯುತ್ತ ಸೂರ್ಯಾಸ್ತವನ್ನು ಆಸ್ವಾದಿಸೊದು, ಆಕೆಯ ಹತ್ತಿರತ್ತಿರ ಸರಿಯೊದು, ಬೆರಳುಗಳನ್ನು ಹಿಡಿಯಲು ಪ್ರಯತ್ನಿಸಿ ಸಿಕ್ಕಿ ಹಾಕಿಕೊಂಡು ಒದ್ದಾಡೊದು, ಲವ್ ಮಾರ್ಕ್ ಕೊರೆಯೊದು…….. ತುಂಬಾ ಮಸ್ತ್ ಆಗಿದೆ. ಹ್ಹ ಹ್ಹ ಹ್ಹಾ. ಇಲ್ಲಿಯ ಜಿರಳೆಯ ಎನಿಮೇಶನ್ ಸಹ ಸಕತ್ ಆಗಿದೆ. ಅದು ದೇಹವನ್ನು ಮುಂದೆ ಬಗ್ಗಿಸಿ ಕುತೂಹಲ ತೋರಿಸೊದು, ಮೀಸೆಯನ್ನು ಹಂದಾಡಿಸಿ ಆಶ್ಚರ್ಯ-ಗಲಿಬಿಲಿ-ಖುಷಿ ತೊರಿಸೋದು, ಟೆನ್ಶನ್ ತಡೆಯಲಾಗದೇ ಅತ್ತಿಂದಿತ್ತ ಸುಳಿದಾಡೊದು, ಕುಪ್ಪಳಿಸಿ excitement ತೋರೊದು…… ವಾವ್!

ಹಾಂಗೆನೆ ಎಕ್ಸಿಯಮ್ ನಲ್ಲಿರುವ ಮನುಷ್ಯರು ಸಹ. ಆ ನೌಕೆ ದೊಡ್ಡ ಹೊಟೇಲ್ ತರಹ. ಏನೂ ಬೇಕೊ ಎಲ್ಲ ಸವಲತ್ತುಗಳು ಇಲ್ಲಿದೆ. ಅದೂ ಫುಲ್ಲಿ ಆಟೊಮ್ಯಾಟಿಕ್. ಇವರಿಗೆ ಕೆಲಸವೇ ಇಲ್ಲ.  ಹಲ್ಲುಜ್ಜುವುದರಿಂದ ಹಿಡಿದು ಮಕ್ಕಳಿಗೆ ಪಾಠ ಹೇಳಿಕೊಡುವ ತನಕ ಎಲ್ಲದಕ್ಕೂ ರೊಬೊಟ್ಸ್. ಗಾಳಿಯಲ್ಲಿ ತೇಲುವಂತಹ ಸೀಟಿನಲ್ಲಿ ಒರೆಗಿ ಎಲ್ಲ ಕೆಲಸವನ್ನೂ ಅಲ್ಲಿಂದಲೇ ಮಾಡುತ್ತಾರೆ. ನಡೆಯುವುದು ಅಂದರೇನೆ ಏನೂಂತ ಗೊತ್ತಿಲ್ಲ. ಸೀಟಿನಿಂದ ಕೆಳಗೆ ಬಿದ್ದರೆ, ವಾಪಸ್ಸು ಸೀಟು ಹತ್ತಿ ಕೂಡ್ರಿಸಲು ರೊಬೊಟ್ ಗಳೇ ಬೇಕು.  ದೈಹಿಕ ಶ್ರಮವಿಲ್ಲದಿದ್ದರಿಂದ ಹಾಗೂ ನೌಕೆಯ ಆರ್ಟಿಫಿಶಿಯಲ್ ಗ್ರಾವೆಟಿಯಿಂದ ಮೂಳೆಗಳೆಲ್ಲ ಸವಕಲಾಗಿ ಮೈಯೆಲ್ಲ ಬೊಜ್ಜು ತುಂಬಿಕೊಂಡಿರುತ್ತದೆ. ಅಕ್ಕ ಪಕ್ಕವೇ ಹೋಗುತ್ತಿದ್ದರೂ ಸಹಿತ ಮಾತನಾಡಲು ಎದುರಿಗಿರುವ ಪರದೆಯನ್ನೇ ಉಪಯೋಗಿಸುತ್ತಾರೆ. ಸ್ಪರ್ಶ ಜ್ಞಾನವಿರಲಿ ಸಾಮಾಜಿಕ ಮುಖಾಮುಖಿಯೇ ಇಲ್ಲ! ನಿಜ. ನಾವು ಸಹ ಮುಂದೊಂದು ದಿನ ಹೀಗೆನೆ ಆಗುತ್ತೇವೆ. ನಾನೇ ನೋಡಿ. ಬೆಳಗ್ಗೆಯಿಂದ ರಾತ್ರಿಯವರೆಗೆ ಕಂಪ್ಯೂಟರ್ ಖುರ್ಚಿ ಬಿಟ್ಟು ಏಳಲ್ಲ. ಬೊಜ್ಜು ಬೆಳೆಯುತ್ತಿದೆಯೇ ಹೊರತು ಕರಗುತ್ತಿಲ್ಲ. ಮಾತಾಡೊದೆಲ್ಲ ಜಿ ಟಾಲ್ಕ್ ನಲ್ಲಿ ಇಲ್ಲಾ ಮೊಬೈಲ್ ನಲ್ಲಿ. ಫ್ರೆಂಡ್ಸ್, ರಿಲೇಟಿವ್ ಎಲ್ಲರ ಜೊತೆ ಸಂವಹನ ಮಾಡೊದು virtual ಆಗಿನೆ. ಓದೊದು, work ಮಾಡೊದು, ಬರೆಯೊದು ಸಹ . ಇಂಟರ್ ನೆಟ್ ನಲ್ಲಿ ನಾನೊಂದು ಡಾಟಾ ಮಾತ್ರ. ಹಾಗಾಗಿಯೇ ರೊಬೊಟ್ ಆಗಿಯೂ, ಈ virtual worldನ ಸದಸ್ಯ ಆಗಿಯೂ ಕೂಡ ಭಾವನೆಗಳನ್ನು ಗುರುತಿಸುವ, ಬಾಯಿ ಎಂಬ ಅಂಗವಿಲ್ಲದೆಯೂ ಶಬ್ದದ ಏರಿಳಿತದಿಂದ ಸಂವಹಿಸುವ, ಸ್ಪರ್ಶ ಸುಖಕ್ಕಾಗಿ, ಮತ್ತೊಬ್ಬ ಸಹ ಜೀವಿಗಾಗಿ ಹಾತೊರೆಯುವ ವಾಲ್ ಇ ನನಗೆ ಪ್ರಿಯನಾಗಿದ್ದಾನೆ.

know more about animation; pixar

this is Sparta

(close up) ಲಿಯೊನಿಡಸ್ ‘This is Sparta’ ಎಂದವನೆ (slow zoom out) ಪರ್ಶಿಯನ್ ರಾಯಭಾರಿಯ ಎದೆಗೆ ಒದ್ದು ಆತನನ್ನು ಹಿಂದೆ ಇದ್ದ ತೆರೆದ ಬಾವಿಗೆ ತಳ್ಳುತ್ತಾನೆ. ಈ ಸೀನ್ ಅನ್ನು ಏಷ್ಟು ಸಲ ನೋಡಿದ್ದೇನೊ ಗೊತ್ತಿಲ್ಲ. ಭರ್ಜಿ ಫ್ರೇಮಿನ ಎಡ ಮೂಲೆಯಿಂದ ಮಧ್ಯಕ್ಕೆ, ಬಲದಿಂದ ಮಧ್ಯಕ್ಕೆ, ಮೇಲಿನಿಂದ ಮಧ್ಯಕ್ಕೆ ಒಂದಾದ ಮೇಲೊಂದರಂತೆ ತೂರುತ್ತದೆ. ಅದಕ್ಕೆ ಅಂಟಿದ ಬಿಸಿ ರಕ್ತ ತೊಟ್ಟಿಕ್ಕುತ್ತದೆ.  wow! ನಿಜ, ನೀವು ಹಾಗೆ ಅನ್ನುತ್ತೀರಿ. ಅಷ್ಟು beautify ಮಾಡಲಾಗಿದೆ. ಲಿಯೊನಿಡಸ್ ರಿದಮಿಕ್ ಆಗಿ ಮುನ್ನುಗ್ಗುತ್ತ ಒಂದು ಏಟಿಗೆ ಒಬ್ಬನನ್ನು ಭರ್ಜಿಯಲ್ಲಿ ತಿವಿದು, ಇನ್ನೊಬ್ಬನನ್ನು ಗುರಾಣಿಯಿಂದ ಕೆಡಗಿ, ಎದುರಿಗಿಂದ ಬರುತ್ತಿರುವನಿಗೆ ಕೈಲಿದ್ದ ಭರ್ಜಿ ತೂರಿ, ಮತ್ತೆ ಗುರಾಣಿಯಿಂದ ಮೇಲೆ ಬಿದ್ದವನನ್ನು ಕೆಡಗಿ, ಕ್ಷಣಾರ್ಧದಲ್ಲಿ ಕತ್ತಿ ತೆಗೆದು ಬಲಕ್ಕೆ ಎರಗಿದವನ ಕಾಲನ್ನು ತುಂಡರಿಸಿ ಇನ್ನೊಂದು ಏಟಿಗೆ ಎದುರಿಗೆ ಬಂದವನನ್ನು ತಿವಿಯುತ್ತಾನೆ. ‘Tonight we dwell in hell’ .ರಕ್ತ ಸ್ಕ್ರೀನ್ ನಲ್ಲಿ ಹೇಗೆ ಹಾರುತ್ತೆ ಗೊತ್ತಾ ? ಕಚಾ ಕಚಾ ಕಚ್ …….. ತಿವಿಯುತ್ತ, ಕಡಿಯುತ್ತ, ಕೆಡಗುತ್ತ. ಸ್ಪಾರ್ಟನ್ನರ ಗ್ರೇ ಬಣ್ಣದ ಗುರಾಣಿ, ಶಿರಸ್ತ್ರಾಣ, ಭರ್ಜಿ-ಅವರ ಕೆಂಪು ಹಿಂಬದಿಯ ಹೊದಿಕೆ- ಯೆಲ್ಲೊ ಟೋನು, ಹಿಂದಿನ ಕಪ್ಪು ಕಲ್ಲು.. ಉಫ್! ನೀವು ಚಿತ್ರದಲ್ಲಿ ಕಳೆದು ಹೋಗುತ್ತಿರಾ. ಶೌರ್ಯ, ಪರಾಕ್ರಮ, ಭುಜಬಲ ಅಕ್ಷರದಿಂದ ಎದ್ದು ಕಣ್ಣೆದುರಿಗಿನ ಚಿತ್ರಣವಾಗುತ್ತದೆ. ಪ್ರತಿಯೊಂದು ನಟರ ಬಾಡಿ( ದೇಹರ್ದಾಡ್ಯತೆ) ನೋಡಬೇಕು. ಹೇಂಗಿದೆ ಗೊತ್ತಾ! ಸ್ಟೆಲಿಯೊಸ್ ನೆಲದಿಂದ ಎದುರಿಗಿನ ಬಂಡೆಯ ಮೇಲೆ ನೆಗೆದು ಅಲ್ಲಿಂದ ಮೇಲೆ ಅಕಾಶಕ್ಕೆ ಚಿಮ್ಮಿ ಹೊಡೆಯಲು ಚಾವಟಿ ಎತ್ತಿದ್ದ ದೂತನ ಕೈಯನ್ನೆ ಕತ್ತರಿಸುತ್ತಾನೆ. ಆತನ ಕಾಲು, ತೊಡೆ, ಭುಜದ ಮಸಲ್ಸ್ ಮೂವ್ ಆಗೊದು ನೋಡಬೇಕು. ಇಷ್ಟು ಚೆಂದವಾಗಿ ಚಿತ್ರ ತೆಗೆಯಲು ಸಾಧ್ಯವೇ ಅನ್ನಿಸಿಬಿಡುತ್ತದೆ.

ಹಾಗೇನೆ ಕ್ಲಿಫ್ ನಿಂದ ಕೆಳಗೆ ಬೀಳುತ್ತಿರುವ ಚಿತ್ರ ಸಹ ಸೂಪರ್ ಆಗಿದೆ. ಫ್ರೇಮಿನ ಎಡ ಭಾಗದಲ್ಲಿ ಪ್ರಪಾತ ಮತ್ತು ಮೇಲೆ ಹಳದಿ ಮೋಡ ಮುಸುಕಿದ ಆಕಾಶ ಎಲ್ ಶೇಪಿನಲ್ಲಿದೆ. ಫ್ರೇಮಿನ ಅರ್ಧಭಾಗದಷ್ಟು ಎತ್ತರದ ಜಾಗವನ್ನು ಬಲಗಡೆಯಿಂದ ಎಡಕ್ಕೆ ಚಾಚಿರುವ ಶಿಖರ ನುಂಗಿದೆ. ಅದರ ಮೇಲೆ ಹಿಂಬದಿಯ ಪ್ರಪಾತ ಮತ್ತು ಮುಂಬದಿಯ ಸ್ಪಾರ್ಟನ್ನರ ನಡುವೆ ಸಿಕ್ಕಿ ಹಾಕಿಕೊಂಡಿರುವ ಕಪ್ಪು ಛಾಯೆಯ ಪರ್ಶಿಯನ್ನರು. ಬಲಗಡೆಯಿಂದ ಫ್ರೇಮಿನ ಮಧ್ಯದವರೆಗೆ ಕೊಲ್ಲುತ್ತ ಬರುತ್ತಿರುವ ಕೆಂಪು ಬಟ್ಟೆಯ ಸ್ಪಾರ್ಟನ್ನರು. ಎಡಗಡೆಯ ಪ್ರಪಾತಕ್ಕೆ ಸಾಲಗಿ ಬುಡ ಬುಡನೇ ಮುಮ್ಮುಖವಾಗಿ ಜಾರುತ್ತಿರುವ ಪರ್ಶಿಯನ್ನರು. ಅದ್ಭುತವಾಗಿದೆ. ಫಿಲ್ಮ್ ನೋಡಿ, ಈ ಚಿತ್ರ ಅನುಭವಿಸಿ. ಈ ಸಿನೆಮದಲ್ಲಿ ಇದೇ ಫ್ರೇಮು ಚೆಂದ ಅಂತ ಹೇಳಕೆ ಆಗೊಲ್ಲ. ಓರಾಕಲ್ ನ ಇಫೊರ್ಸ್, ಫಾಲಾಂಕ್ಸ್, ಕ್ಸೆರಕ್ಸಿ, ಇಮ್ಮೊರ್ಟಲ್ ಜೊತೆಗಿನ ಕಾದಾಟ, ಶವಗಳ ಗೋಡೆ, ಖೇಂಡಾಮ್ರಗವನ್ನು ಸಾಯಿಸುವುದು,….ಹೀಗೆ ಎಲ್ಲ ಪ್ರತಿಮೆಗಳೂ ಚೆನ್ನಾಗಿವೆ. ನಂಗೆ ಯುದ್ಧದ ಪ್ರತಿ ಫ್ರೇಮು ತುಂಬಾನೇ ಇಷ್ಟವಾಯಿತು. ಪ್ರಾರಂಭದಲ್ಲಿನ ಕರಿ ತೊಳವನ್ನು ಮಂಜಿನ ತಣ್ಣನೆಯ ರಾತ್ರಿಯಲ್ಲಿ ಸಾಯಿಸುವುದರಿಂದ ಹಿಡಿದು ಕೊನೆಯಲ್ಲಿ ಲಿಯೊನಿಡಸ್ ಮತ್ತು ಸಹಚರರು ಸತ್ತ ಚಿತ್ರಣದವರೆಗೂ. ಪ್ರತಿ ಫ್ರೇಮು ಒಂದು ಸುಂದರ ಚಿತ್ರವೇ ಆಗಿದೆ.

300 ಇದು ಫುಲ್ ಟೆಕ್ನಿಕಲ್ ಚಿತ್ರ. ಹೆಚ್ಚಿನ ಭಾಗವನ್ನು ಗ್ರೀನ್ ಸ್ಕ್ರೀನ್ ಬಳಸಿ ಚಿತ್ರಿಸಲಾಗಿದೆ. ಬಾಕ್ ಡ್ರಾಪ್ ಗಳೆಲ್ಲ ಕಂಪ್ಯೂಟರ ಗ್ರಾಫಿಕ್ಸ್. ಇಡೀ ಸಿನೆಮಾವನ್ನು ಫಿಲ್ಟರ್ ಹಾಕಿ ಕಲರ್ ಕರೆಕ್ಷನ್….. ಪ್ರೊಸೆಸ್  ಮಾಡಲಾಗಿದೆ. ಫ್ರಾನ್ಕ್ ಮಿಲ್ಲರನ ಗ್ರಾಫಿಕ್ ನೊವೆಲ್ ಅನ್ನು ಯಥಾವತ್ ಅನುಕರಣೆ ಮಾಡಲಾಗಿದೆ. ಆತನ ಚಿತ್ರಗಳಿಗೆಲ್ಲ ಈ ಸಿನೆಮಾದಲ್ಲಿ ಜೀವ ಬಂದಿದೆ. ಆತನ ಇನ್ನೊಂದು ಗ್ರಾಫಿಕ್ ನೊವೆಲ್ ಸಿನ್ ಸಿಟಿ ಸಹ ಇದೇ ರೀತಿ ಸಿನೆಮಾ ಆಗಿತ್ತು.

ಹಾಗಂತ ಎಲ್ಲರಿಗೂ ಈ ಸಿನೆಮಾ ಇಷ್ಟವಾಗುತ್ತೊ ಇಲ್ವೊ ಗೊತ್ತಿಲ್ಲ. ಇಲ್ಲಿ ರಕ್ತ ಹಾರುತ್ತೆ, ಕಾಲು-ಕೈ-ರುಂಡವೆಲ್ಲ ಎತ್ತರೆತ್ತರ ಹಾರಿ ಬೀಳುತ್ತೆ. ಎಲ್ಲೂ ಹಾರರ್ ಸಿನೆಮಾ ತರಹವೇನೂ ಅನ್ನಿಸುವುದಿಲ್ಲ. ಹಿಲ್ಸ್ ಹ್ಯಾವ್ ಆಯ್ಸ್ ತರಹ ಖಂಡಿತ್ ಸೈಕಿಕ್ ಆಗಿಲ್ಲ. ರುದ್ರ ರಮಣೀಯ ಅಂತಾರಲ್ಲ, ಹಾಗಿದೆ. ಇಲ್ಲಿ ಸತ್ತವರ ಬಗ್ಗೆ ಕನಿಕರವೂ ಬರುವುದಿಲ್ಲ. ‘No prisoners, No mercy.’ ಇಲ್ಲಿ ನೀವು ಒಬ್ಬ ಲಿಯೊನಿಡಸ್ ಆಗಿರುತ್ತೀರಿ. ಸ್ಪಾರ್ಟನ್ ಸೈನಿಕರಾಗಿರುತ್ತೀರಿ. ‘We do what we are trained to do, we do what we are breed to do, we do what we are born to do’. ಆದರೆ ನೀವು ಪರ್ಷಿಯನರ ತರಹ ಇದನ್ನೆಲ್ಲ “this is madness” ಅನ್ನುವರಾದಲ್ಲಿ ಈ ಸಿನೆಮಾ ನೋಡಬೇಡಿ. ಇದು ಖಂಡಿತ ನಿಮ್ಮಂತವರಿಗಲ್ಲ.

ಇನ್ನು ಈ ಸಿನೆಮಾ ಚರಿತ್ರೆಯ ಅಂಶಗಳನ್ನು ಒಳಗೊಂಡಿದ್ದರೂ ಸಹ ಇಲ್ಲಿ ತೋರಿಸಿದ್ದೆಲ್ಲ ಸತ್ಯವಲ್ಲ.  dramatize ಆಗಿದೆ. ಪರ್ಷಿಯನ್ ಕಿಂಗ್  ಕ್ಸೆರಕ್ಸಿಯನ್ನು ಬೇರೆ ರೀತಿಯಲ್ಲಿ ಚಿತ್ರಿಸಲಾಗಿದೆ. ಆತ ಈ ಕತೆಯಲ್ಲಿ ವಿಲನ್ ಆಗಿದ್ದಕ್ಕೆ ಕ್ಸೆರಕ್ಸಿಯ  characterization ಬಗ್ಗೆ ನಂಗೆ ತಕರಾರಿಲ್ಲ. Thermopylaeದಲ್ಲಿ ನಡೆದ ಯುದ್ಧದಲ್ಲಿ ಸ್ಪಾರ್ಟನ ರಾಜನಾಗಿದ್ದ ಲಿಯೊನಿಡಸ್ ಕೇವಲ ೩೦೦ ಜನ ಸೈನಿಕರ ಜೊತೆ ಸಹಸ್ರ ಸಂಖ್ಯೆಯಲ್ಲಿದ್ದ ಪರ್ಷಿಯನ್ನರನ್ನು ಎದುರಿಸಿ ದಂತ ಕಥೆಯಾದದ್ದು, ಆದಾದ ಒಂದು ವರ್ಷದಲ್ಲಿ battle of Plataeaದಲ್ಲಿ (479 BC) ಗ್ರೀಕರೆಲ್ಲ ಸೇರಿ ಪರ್ಶಿಯನ್ನರನ್ನು ಹಿಮ್ಮೆಟಿಸಿದ್ದು ಎಲ್ಲ ಚಾರಿತ್ರಿಕ ಸತ್ಯಗಳೇ. ಜೊತೆಗೆ ಚಿತ್ರದ ಪ್ರಾರಂಭದಲ್ಲಿ ತೊರಿಸಿದಂತೆ ಹುಟ್ಟಿದ ಸ್ಪಾರ್ಟನ್ ಶಿಶುಗಳು ದುರ್ಬಲರಾಗಿದ್ದರೆ ಅವುಗಳನ್ನು ಕೊಲ್ಲಲಾಗುತ್ತಿತ್ತು. “From the time he could stand, he was baptized in the fire of combat, Tought never to retreat, never to surrender, Tought the death on the battlefield to the service of Sparta was the greatest glory he could achieve in his life ” ಹುಡುಗರಿಗೆ ಏಳು ವರ್ಷ ತುಂಬುತ್ತಿದ್ದಂತೆ ಅಗೊಗೆ ಎಂದು ಕರೆಯಲ್ಪಡುತ್ತಿದ್ದ ಸೈನಿಕ ತರಭೇತಿಗೆ ಕಲಿಸಲಾಗುತ್ತಿತ್ತು. “to create the finest soldier world ever known”.  ಸ್ಪಾರ್ಟಾದ ನಾಗರೀಕರೆಲ್ಲರೂ ಸೈನಿಕರೇ ಆಗಿದ್ದರು. ” Spartans, what is your profession? ….aahu! aahu!! ” .  ಅಲ್ಲಿನ ಸ್ತ್ರೀಯರಿಗೆ ಮುಕ್ತ ಅವಕಾಶಗಳು ಲಭ್ಯವಾಗಿದ್ದವು. ” what can make this woman thinks she can speaks among men? Because only Spartans women give birth to real man ” .  ಸಿನೆಮಾದಲ್ಲಿ ಇದ್ದಂತೆ ರಾಣಿ ಗೊರ್ಗೊ ನಿಜಕ್ಕೂ ಪ್ರಭಾವಶಾಲಿ ವ್ಯಕ್ತಿಯಾಗಿದ್ದಳು. …….. ಹೀಗೆ ಅನೇಕ ಇತಿಹಾಸದ ಪುಟಗಳು ನಮ್ಮೆದುರು ತೆರೆದುಕೊಂಡಿವೆ.

ನಂಗೆ ಬೇಜಾರಾಗಿದ್ದೇನು ಅಂದರೆ ನಾನು ಮೊದಲು ನೋಡಿದ ಒನ್ ಲೈನ್  ಆವೄತ್ತಿಯಲ್ಲಿ ಇದ್ದ ಆಪ್ತ ದೄಶ್ಯಗಳು ಈ DVDನಲ್ಲಿ ಕಾಣೆಯಾಗಿವೆ.  ನಮ್ಮ ದೇಶದಲ್ಲಿ ಬಿಡುಗಡೆ ಮಾಡುವ ಮೊದಲು ಕತ್ತರಿಯಾಡಿಸಿರಬೇಕು. ಮೊನ್ನೆ ಇಲ್ಲಿ ಒಬ್ಬ ಆರ್ಟಿಸ್ಟ್ ಶಿವನನ್ನು ನಗ್ನವಾಗಿ ಚಿತ್ರಿಸಿದ್ದಾನೆ ಎಂದು ಗಲಾಟೆಯಾಗಿ ಆತ ಆ ಚಿತ್ರವನ್ನು ಪ್ರದರ್ಶನದಿಂದ ಹೊರಗಿಡಬೇಕಾಗಿ ಬಂತು. ಲಲಿತ ಕಲೆಯನ್ನು ಕೇವಲ ಕಲೆಯಾಗಿ ನೋಡಲು ನಮ್ಮಿಂದ ಏಕೆ ಸಾಧ್ಯವಿಲ್ಲವೋ! human anatomy ಕಲಿಬೇಕಾದರೆ ಅದನ್ನೆಲ್ಲ ಕಾಮುಕ ದೄಷ್ಟಿಯಲ್ಲಿ ನೋಡಕಾಗುತ್ತಾ! ಹಣೆಬರಹ. ನಮ್ಮನೆಯಲ್ಲಿ ನೋಟೀಸ್ ಬೊರ್ಡ್ ನಲ್ಲಿರುವ anatomy drawings ಹಾಗೂ inspirations ಚಿತ್ರಗಳನ್ನು ನೋಡಿ ಕೆಲಸದವಳು ಮುಸಿ ಮುಸಿ ನಗುತ್ತಿರುತ್ತಾಳೆ. ಅವಳೇನೊ ಓದು-ಬರಹ ಬಾರದವಳು ಎಂದು ಕ್ಷಮಿಸಬಹುದು. ಆದರೆ………

ಈ ವಿಷಯದ ಬಗ್ಗೆ ಚರ್ಚೆ ಇಲ್ಲಿ ಅನಾವಶ್ಯಕ. ಆದ್ರೆ ನಾನು ನಾಳೆ ರಾಮಾಯಣದ ಮೇಲೆ ಸಿನೆಮಾ ಮಾಡಿದ್ರೆ, ಆಗೀನ ತರಹವೇ ವಸ್ತ್ರಾಲಂಕಾರ ಇರಬೇಕು ಅಂದುಕೊಂಡಿದ್ದೇನೆ. ಅದು ಭಾರತದಲ್ಲಿ ಬಿಡುಗಡೆನೆ ಕಾಣಲಿಕ್ಕಿಲ್ಲ ಬಿಡಿ. ಹೋಗ್ಲಿ. ನಿಮ್ಮಲ್ಲಿ ಯಾರದರೂ 300 ನೋಡಿದ್ರೆ, ನೋಡಾದ ಮೇಲೆ ನಿಮ್ಮ ಅಭಿಪ್ರಾಯ ನನಗೆ ಖಂಡಿತ ತಿಳಿಸಿ.

also check this-  300 comic to screen comparison